Sainmhíniú ar aidhmeanna an pholasaí
Tagann an dréachtpholasaí faoi Straitéis Teanga na Comhairle mar ar glacadh léi den chéad uair in 2018 agus a athbhreithníodh ar bhonn rialta ó shin. Is é croílár na Straitéise Teanga an gá atá le héagsúlacht a chuimsiú in uaillmhian na Comhairle go mbeadh Béal Feirste ina cathair fháilteach agus chuimsitheach d’achan duine.
Agus an Straitéis Teanga á forbairt, thug an Chomhairle aird ar oibleagáidí agus caighdeáin dlí idirnáisiúnta agus intíre. Tá Creat Teanga uileghabhálach sa Straitéis a cheadaíonn d’fhorbairt polasaithe ar leith ar:
- An Ghaeilge
- Ultais
- Teangacha eile (lena n-áirítear teangacha comharthaíochta)
Ag obair i gcomhthéacs na gcreat teangeolaíoch seo, is é cuspóir an dréachtpholasaí seo ná céimeanna sonracha a chur ar fáil a leanfaidh an Chomhairle leis an Ghaeilge a chur chun cinn ina cuid oibre féin agus le tacú le pobal na gcainteoirí Gaeilge i mBéal Feirste atá ag dul i méid.
Ag teacht le haidhmeanna na Straitéise Teanga 2018 - 2023, úsáid na Gaeilge a chur chun cinn, a chosaint agus a fheabhsú go hinmheánach agus ar fud mhórlimistéar na Comhairle de réir na sé Threoir-Phrionsabal mar a chomhaontaigh Coiste Straitéiseach Polasaí & Acmhainní na Comhairle i Meitheamh 2022.
Is é aidhm an pholasaí seo:
- An dearcadh ar theangacha inár gcathair a athrú le próifíl na dteangacha éagsúla a mhéadú mar aon le feasacht agus tuiscint ar chultúir, oidhreacht agus traidisiúin ghaolmhara.
- Dul i ngleic le pobail teanga le comhdheiseanna a mhéadú agus le dea-chaidreamh sa chathair a fheabhsú agus a chosaint.
- Cumas eagraíochtúil a fheabhsú le haghaidh a thabhairt ar riachtanais oiliúna na foirne agus ár gcumas teanga a fheabhsú.
- Oibriú i gcomhpháirtíocht le daoine eile le héagsúlacht teanga a chur chun cinn ar fud na cathrach le bogadh i dtreo ár bhfís chomhroinnte maidir le fás cuimsitheach, ina mbíonn achan duine san áireamh.
- Gníomhartha a aithint agus a chur i bhfeidhm de réir tosaíochtaí comhaontaithe le héagsúlacht teanga a chur chun cinn, a chosaint agus a fheabhsú.
- Réitigh éifeachtúla agus éifeachtacha a bhunú atá comhréireach leis an riachtanas, inacmhainne agus intomhaiste.
