Cúlra
Baineann an Mheasúnacht Tionchair Chomhionannais (EQIA) le dréacht-Pholasaí Gaeilge Chomhairle Cathrach Bhéal Feirste (‘an Chomhairle’) agus is cur i gcrích í ar Straitéis Teanga na Comhairle mar ar glacadh léi in 2018.
Alt 75
Tá an EQIA á déanamh de réir dhualgais reachtúla Chomhairle Cathrach Bhéal Feirste (na Comhairle) faoi Alt 75 agus Sceideal 9 d’Acht Thuaisceart Éireann 1998. Ceanglaíonn Alt 75 ar an Chomhairle, le linn di a feidhmeanna a chomhlíonadh i dTuaisceart Éireann, aird chuí a thabhairt ar an ghá atá le comhionannas deiseanna a chur chun cinn:
- idir daoine a bhfuil creideamh agus tuairimí polaitíochta éagsúla acu, daoine ó chiníocha áirithe, agus daoine a bhfuil aois, stádas pósta nó claonadh gnéasach éagsúil acu
- idir mná agus fir go ginearálta;
- idir daoine a bhfuil míchumas acu agus daoine nach bhfuil; agus
- idir daoine a bhfuil cleithiúnaithe acu agus daoine nach bhfuil.
Gan dochar do na hoibleagáidí sin, ceanglaítear ar an Chomhairle aird a thabhairt fosta ar a inmhianaithe atá sé dea-chaidreamh a chur chun cinn idir daoine a bhfuil creidimh éagsúla acu, daoine a bhfuil tuairimí polaitiúla éagsúla acu nó daoine ó chiníochaí áirithe.
Leagann Sceideal 9 d'Acht Thuaisceart Éireann 1998 (‘Acht 1998’) amach an nós imeachta mionsonraithe chun na dualgais seo a chur i bhfeidhm, lena n-áirítear cleachtaí scagtha a dhéanamh agus EQIAanna ar pholasaithe.
Agus EQIA á déanamh aici, tugann an Chomhairle gealltanas go leanfar an treoir a d’eisigh Coimisiún Comhionannais Thuaisceart Éireann. Molann an treoir seo gur chóir go mbeadh seacht gcéim sa phróiseas EQIA [1]:
- Céim 1: Sainmhíniú ar aidhmeanna an pholasaí
- Céim 2: Measúnú a dhéanamh ar shonraí agus ar thaighde atá ar fáil
- Céim 3: An tionchar a mheas
- Céim 4: Measúnú a dhéanamh ar bhearta maolaithe
- Céim 5: Comhairliúchán foirméalta
- Céim 6: Torthaí an EQIA a mheas agus a fhoilsiú
- Céim 7: Monatóireacht ar thionchar diúltach
[1] - Treoir Phraiticiúil ar Mheasúnú Tionchair Chomhionannais, ECNI 2004
